• Rannsóknasetur verslunarinnar

Mikil verslun á veirutímum

Updated: Nov 16

Aukning hefur orðið á innlendri kortaveltu í verslun milli ára í hverjum mánuði frá því í mars síðastliðnum. Í októbermánuði versluðu Íslendingar vörur fyrir 42 milljarða kr. með kortum sínum og jókst veltan um 26% frá sama mánuði í fyrra. Að sama skapi var mikil aukning í netverslun, líkt og í fyrstu bylgjunni, enda ljóst að hertar samkomutakmarkanir þrýstu neytendum á vefinn. Velta íslenskra korta nam 3 milljörðum í netverslun, innanlands.

Innlend kortavelta í stórmörkuðum og dagvöruverslunum nam 18,3 millj. kr. í október og jókst um 31% á milli ára. Jafnframt jókst veltan um 10% á milli mánaða. Líklega er stærsta skýring hækkunarinnar lokun mötuneyta og minni neysla á veitingastöðum en velta síðarnefnda flokksins dróst saman um 21,5% í október.

Í september spáðum við í spilin varðandi fataverslun í þriðju bylgjunni, en hún átti mjög undir högg að sækja í fyrstu bylgju. Í október jókst innlend kortavelta fataverslana um 2,7% samanborið við fyrra ár. 15% fataverslunar í október fór fram á netinu samanborið við 6% í september og er það til marks um sveigjanleika kaupmanna og neytenda og þess að Íslendingar hafi lært að lifa með veirunni.

Íslendingar virðast halda áfram að uppfæra allskyns raftæki, en velta í þeim flokki jókst um tæp 45% milli ára og nam 2,6 milljörðum kr. Þar af nam netverslun flokksins tæplega 436 milljónum kr., jókst hún um 216% milli ára, og stóð að baki 16% allrar verslunar í flokknum.





Á öðrum sviðum voru minni umsvif í október. Sem dæmi um þetta dróst innlend kortavelta bensínstöðva saman um 13,4% frá október í fyrra. Þetta er í samræmi við minni umferð samkvæmt mælingum Vegagerðarinnar en hún dróst saman um 31% á hringveginum og um 9,5% á höfuðborgarsvæðinu frá fyrra ári.

Fátt var að frétta af erlendum greiðslukortum í október. Erlend kortavelta mánaðarins nam 1,8 milljarði og minnkaði um 89,4% frá okóber 2019. Kortavelta í heild í október, það er bæði innlendra og erlendra korta, nam 69,85 milljarði kr. og minnkaði um 16% frá sama mánuði í fyrra. Verslun jókst á þann mælikvarða um tæp 17% og aðrir flokkar drógust saman um tæp 42%.

Recent Posts

See All

Smásöluvísitalan bergmálar kortaveltu tölur

Smásöluvísitalan hefur verið birt fyrir september mánuð. Líkt og innlendu kortaveltu tölurnar báru með sér, er mikil aukning á veltu milli ára í september. Til að mynda jókst sala á gólfefnum um 35,2%

Shopping Basket

Rannsóknasetur verslunarinnar

Hagtölur og rannsóknir í verslun
SKRÁÐU ÞIG Á PÓSTLISTANN!

© 2020 Rannsóknasetur verslunarinnar

Staðsetning:

  Háskólinn á Bifröst,
  311 Borgarbyggð,

  Sími: 533 3530 

  GSM: 868 4341 eða 868 8825