top of page

Spá um jólaverslun 2023


Rannsóknasetur verslunarinnar (RSV) spáir 0,29% samdrætti í smásöluverslun um jólin á föstu verðlagi.


Nú þegar stutt er til jóla er gott að fara að huga að jólainnkaupunum en nokkuð ljóst er að landsmenn eru fyrr á ferðinni í ár heldur en oft áður vegna tilboðsdaga á borð við Dag einhleypra (e. Singles Day), Svartan föstudag (e. Black Friday) og NetMánudag (e. Cyber Monday). En hækkandi stýrivextir sem hafa hækkað greiðslubyrði húsnæðislána, 8% verðbólga og hækkun matarkörfunnar gefur í skyn að landsmenn hugi betur að veskinu í ár. Þó að við munum greina betur síðar hvernig landsmenn nýttu þessa þrjá tilboðsdaga að þá hefur það færst í aukana að fólk sé að klára jólainnkaupin fyrr en áður.





Einkaneysla hefur hækkað um 12,9% að meðaltali á árinu. Það má rekja til hækkun vöruverðs en innlend velta í dagvöruverslun hefur hækkað um 17,7% á árinu. Þá hefur verið aukning í smásöluverslun samkvæmt virðisaukaskattskýrslum um 10,1% á árinu. Þróun Kortaveltu RSV á árinu hefur sýnt að árið fór mun betur af stað en árið á undan en það hægðist svo á neyslunni þegar líða fór á haustið. Væntingavísitala Gallup hefur að meðaltali lækkað um 11,6% á árinu en væntingavísitalan metur stöðu efnahagsástandsins og atvinnuástandsins hverju sinni.




Spá RSV um jólaverslun 2023 gerir ráð fyrir 0,29% samdrætti í jólaverslun ársins á föstu verðlagi og spá RSV er að jólaverslun í smásölu verði 135,9 milljarðar króna en spáin nær yfir bæði nóvember og desember mánuð. Jólaverslunin árið 2022 var 126,1 milljarður króna.



Íslendingar hyggjast eyða 12.000 kr. minna í jólagjafir í ár en í fyrra


RSV gerði könnun í samstarfi við Prósent um hvað Íslendingar hyggjast eyða miklu í jólagjafir í ár. Íslendingar ætla að eyða um 99.000 kr. í jólagjafir í ár í samanburði við 111.000 kr. í fyrra. Það er 11,3% lækkun á milli ára.





Þá er lækkunin hlutfallslega mest hjá fólki 65 ára og eldri en konur eru líklegri til að eyða meiru í jólagjafir en karlar í ár. Gögnunum var safnað frá 9. til 20. nóvember 2023 og var úrtakið 1.800 manns en svarhlutfallið 52%.


Jólaspá RSV horfir til þróun kaupmáttar launa og vísitölu neysluverðs, þróun kortaveltu, þróun einkaneyslu, þróun smásöluverslunar samkvæmt virðisaukaskattsskýrslum, vísitölu RSV um smásöluverslun og væntingavísitölu Gallup.

129 views

Comments


bottom of page