Erlend netverslun hefur aldrei mælst meiri síðan RSV hóf að safna saman gögnum um erlenda netverslun Íslendinga. Nýjar tölur fyrir nóvember 2023 sýna að Íslendingar eyddu 3,07 milljörðum króna í erlenda netverslun. Það er hækkun um 25,9% á milli ára. Vert er að taka það fram að netverslun innanlands í nóvember 2023 samkvæmt kortaveltugögnum RSV nemur tæpum 18 milljörðum króna.
Þá vekur athygli að flokkurinn bækur, blöð og hljómplötur hefur færst í aukana og fólk er að sjá hag sinn í því að kaupa bækur í erlendri netverslun. Sá flokkur hækkar um 45,7% á milli ára og nam 104 milljónum króna í nóvember.
Rannsóknasetur verslunarinnar hefur haldið úti netverslunarvísi RSV frá því í janúar 2022 með því að fá gögn um erlenda netverslun Íslendinga frá Tollinum. Vísitalan sýnir breytingu í umfangi erlendrar netverslunar á milli mánaða eftir tegundum verslunar. Tilgangurinn er að meta umfang og fylgjast með þróun erlendrar netverslunar. Upplýsingarnar eru mikilvægur þáttur í að greina neysluhegðun einstaklinga og gagnast verslunum og fyrirtækjum í landinu til að meta stöðu sína gagnvart erlendu vöruframboði og samkeppni. Vísitalan miðast við breytilegt verðlag.